វិទ្យុអាស៊ីសេរី, ដោយ អ៊ុក សាវបូរី 2010-09-02
អតីតក្រុមកម្មករសំណង់នៃសហគ្រាសផលិតគ្រឿងសំណង់ ខេស៊ី ហ្សេស៊ីន (KC Gecin Enterprises) ដែលត្រូវបញ្ឈប់ពីការងារ បានផ្អាកការតវ៉ាហើយ កាលពីថ្ងៃ១ កញ្ញា ដើម្បីរង់ចាំការដោះស្រាយពីក្រសួងការងារ។
តំណាងកម្មករសំណង់នៃសហគ្រាសផលិតគ្រឿងសំណង់ ខេស៊ី ហ្សេស៊ីន នៅការដ្ឋានព្រែកហូរ ខេត្តកណ្ដាល លោក ជា សុភាព បានឲ្យដឹងថា កម្មករបញ្ឈប់ការតវ៉ានៅថ្ងៃទី១ កញ្ញា ព្រោះស្ដាប់តាមបញ្ជាពីក្រុមប្រឹក្សាអាជ្ញាកណ្ដាលបានសម្រេចឲ្យ ក្រុមកម្មករ ផ្អាកការតវ៉ាសិនរង់ចាំ ១៥ថ្ងៃនៃការដោះស្រាយកិច្ចចរចា។
លោកបានបន្តថា ៖ «គាត់នឹងយករឿងទៅដោះស្រាយឲ្យពួកខ្ញុំហ្នឹង។ បើថា អត់មានដំណោះស្រាយ ពួកខ្ញុំនឹងឡើងទៅតុលាការទៀត!»។
ក្រុមកម្មករឲ្យដឹងទៀតថា កាលពីរសៀលថ្ងៃ៣១ ខែសីហា ក្រុមប្រឹក្សាអាជ្ញាកណ្ដាលបានផ្ដល់លិខិតលេខ០១០ ឲ្យពួកគេ ២១នាក់ ដែលសហគ្រាសមិនទាន់បញ្ឈប់ជាផ្លូវការ កាន់ទៅបង្ហាញសហគ្រាសដើម្បីឲ្យសហគ្រាសទទួលយកពួកគេចូលធ្វើការ វិញ។ ប៉ុន្តែត្រូវសហគ្រាសបដិសេធ ដោយសំអាងថា សហគ្រាសមិនទាន់បានទទួលលិខិតផ្លូវការពីក្រុមប្រឹក្សាអាជ្ញាកណ្ដាល នៃក្រសួងការងារ។
ឆ្លើយតបបញ្ហានេះ ប្រធានរដ្ឋបាលសហគ្រាសផលិតគ្រឿងសំណង់ ខេស៊ី ហ្សេស៊ីន លោក ង៉ែត សំអុល បានថ្លែងថា ក្រុមកម្មករធ្វើបាតុកម្មចោទថា សហគ្រាសរើសអើងការសុំបង្កើតសហជីព គឺខុសទាំងស្រុង។ សហគ្រាសមិនមានលិខិតស្នើសុំជាផ្លូវការពីកម្មករទាំងនោះ ក្នុងការបង្កើតសហជីពទេ។ រីឯការចោទថា សហគ្រាសបញ្ឈប់កម្មករនោះ គឺមិនមែនបញ្ឈប់ទេ កម្មករទាំងនោះជួលប្រចាំថ្ងៃ គ្មានកុងត្រាអ្វីទាំងអស់។ លោកឲ្យដឹងថា នៅថ្ងៃសុក្រចុងសប្ដាហ៍នេះ លោកនឹងទៅទទួលលិខិតផ្លូវការលេខ០១០ ពីក្រសួងការងារ និងទៅបំភ្លឺបញ្ហាមួយចំនួន ដែលមិនទាន់ចរចាត្រូវរ៉ូវគ្នា។
លោក ង៉ែត សំអុល បានឲ្យដឹងថា ៖ «ពីព្រោះគាត់ធ្វើបាតុកម្មនេះ គឺគាត់មិនបានស្នើសុំមកក្រុមហ៊ុន ដោះស្រាយឲ្យអស់លទ្ធភាពជាមួយក្រុមហ៊ុនទេ។ អត់មានដោះស្រាយអ្វីទាំងអស់ ជាមួយក្រុមហ៊ុន ថាគាត់ចង់បានអីពីក្រុមហ៊ុន គាត់ត្រូវដោះស្រាយជាមួយក្រុមហ៊ុនសិន។ ចំណុចណាដែលគាត់ចង់បាន ចំណុចណាដែលគាត់មិនចង់បាន ឬក៏មិនពេញចិត្ត គាត់ត្រូវដោះស្រាយឲ្យអស់លទ្ធភាពជាមួយក្រុមហ៊ុនឲ្យបាន ១ដង ឬចង់យ៉ាងហោចឲ្យបានម្ដងសិន ប៉ុន្តែនេះអត់មានទាល់តែសោះ គឺគាត់ចាប់ផ្ដើមឡើងរត់ ឈប់ ហើយគាត់នាំគ្នាមកបណ្ដោយ មកដាក់បដាប្រឆាំងក្រុមហ៊ុនតែម្ដង ហើយយើងអត់យល់ពីគោលបំណងរបស់គាត់ដែរ»។
ប្រធានក្រុមប្រឹក្សាអាជ្ញាកណ្ដាលនៃក្រសួងការងារ លោកស្រី បូរ ចាន់វាសនា បានថ្លែងថា នៅថ្ងៃសុក្រ ទី៣ ខែកញ្ញា ឆ្នាំ២០១០ខាងមុខនេះ ក្រុមប្រឹក្សាអាជ្ញាកណ្ដាលនឹងបើកកិច្ចប្រជុំដោះស្រាយវិវាទការងារជា ថ្មី រវាងអតីតក្រុមកម្មករសំណង់ និងសហគ្រាសផលិតគ្រឿងសំណង់ ខេស៊ី ហ្សេស៊ីន។
លោកស្រី បូរ ចាន់វាសនា បានបញ្ជាក់ថា ៖ «ដំណើរការហ្នឹងនៅលើ ក្រុមប្រឹក្សាអាជ្ញាកណ្ដាល។ អាជ្ញាកណ្តាលគាត់នឹងកោះហៅធ្វើសវនាការនៅថ្ងៃស្អែក ហើយលទ្ធផលយ៉ាងណា យើងអត់ទាន់ដឹងទេ! យើងចាំមើលបន្តទៅទៀត»។
អនុប្រធានទី១ នៃសហព័ន្ធសហជីពសំណង់ និងព្រៃឈើកម្ពុជា លោក សុខ គីម បានឲ្យដឹងថា កម្មករសំណង់គោរពតាមច្បាប់ការងារ ដែលបានចែង និងគោរពតាមក្រុមប្រឹក្សាអាជ្ញាកណ្ដាលដែលបញ្ជាឲ្យកម្មករផ្អាកការ តវ៉ា និងរង់ចាំការដោះស្រាយរបស់ក្រសួងការងារ។ លោកថា សហព័ន្ធសហជីពកម្មករសំណង់ និងព្រៃឈើ នឹងខិតខំជួយជំរុញឲ្យមានការចរចាត្រូវរ៉ូវគ្នារវាងសហគ្រាស និងកម្មករ ដើម្បីឲ្យសហគ្រាសទទួលយកកម្មករចូលធ្វើការវិញ៕
អានព័ត៌មានដូចគ្នាជាភាសាអង់គ្លេស ចុចទីនេះ ឬប្រើ អាសយដ្ឋាននេះ៖ http://chiatkh.blogspot.com/2010/09/kc-gecin-takes-stubborn-stand-abusing.html
No comments:
Post a Comment