ចុះហេតុអ្វីពួកគាត់អាចរស់នៅបានរហូតដល់សព្វថ្ងៃនេះ? បញ្ញានេះគឺបណ្ដាលមកពីកត្តាមួយគឺពួកគាត់អាចឆ្លៀតពេលពីការងារស្នូលរបស់គាត់ទៅ រកការងារបន្ទាប់បន្សំដើម្បីរកប្រាក់ចិញ្ចឹមប្រពន្ធ ផ្គត់ផ្គង់កូនរៀនសូត្រ និងចំណាយប្រចាំថ្ងៃសម្រាប់បន្តជីវិតរស់នៅ។
ចុះរឿងខាងក្រោមនេះរបស់មន្ត្រីនគរបាលវាយ៉ាងម៉េចដែរ? តាមខ្លឺមសារនៃអត្ថបទចុះផ្សាយរបស់កាសែតកោះសន្តិភាព ខេមរាសូមឯកភាពថា វាអញ្ចឹងមែន។ ដូច្នេះខេមរាក៏សូមសួរថា តើនេះជាបញ្ហារបស់បុគ្គល ឬជាបញ្ហារបស់សង្គម? ខេមរាយល់ថា មួយផ្នែកតូចជាបញ្ហារបស់បុគ្គល រីឯមួយផ្នែកធំទៀតជាបញ្ហារបស់សង្គម ឬបញ្ហាគ្រប់គ្រងរបស់រដ្ឋ ព្រោះថា ប្រសិនបើរដ្ឋគ្រប់គ្រងបានល្អ ផ្ដល់ប្រាក់ខែគ្រប់គ្រាន់ មានមន្ត្រីមានសមត្ថភាព ក្នុងការបំពេញការងារ ដូច្នេះខ្ញុំជឿថា បញ្ហាក៏នឹងគ្មានកើតឡើងបែបនេះទេ។ តើលោកអ្នកអានយល់យ៉ាងណាដែរ?
សូមអានអត្ថបទរបស់កាសែតកោះសន្តិភាពទាំងស្រុងដូចខាងក្រោមនេះ៖
ឡី ចាន់ឆាយ៖ តើថ្លៃថ្នូរឬទេ បើមកធ្វើការគ្រាន់តែ«ស៊ីញ៉េ»វត្តមានហើយទៅផ្ទះវិញ?: "
ខេត្តប៉ៃលិន ៖ លោកឡី ចាន់ឆាយ ស្នងការនគរបាលខេត្ត បានស្តីបន្ទោសធ្ងន់ៗចំពោះមន្ត្រីនគរបាលក្រោមឱវាទរបស់លោកថា តើមន្ត្រីនគរបាលយើងនៅមានភាពថ្លៃថ្លូរ ឬទេ បើមកធ្វើការគ្រាន់តែស៊ីញ៉េវត្តមាន ហើយទៅផ្ទះវិញនោះ? លោកបានមានប្រសាសន៍ដូច្នេះក្នុងឱកាសបើកកិច្ចប្រជុំបូកសរុបលទ្ធផលការងារប្រចាំខែកញ្ញា និងលើកទិសដៅអនុវត្តបន្តសំរាប់ខែតុលា ឆ្នាំ២០១០ ដែលបានធ្វើឡើងកាលពីថ្ងៃទី២៤ កញ្ញា កន្លងមក នៅស្នងការដ្ឋាននគរបាលខេត្តប៉ៃលិន ។
លោកឡី ចាន់ឆាយ បានមានប្រសាសន៍ថា កន្លងមកមានការរាយការណ៍ពីមន្ត្រីនគរបាលមួយចំនួនដែលមកធ្វើការគ្រាន់តែស៊ីញ៉េវត្តមាន ហើយក៏គេចទៅផ្ទះបាត់មិននៅធ្វើការ ។ ជាក់ស្តែងសូម្បីតែពេលប្រជុំនេះ ក៏ដូច្នេះដែរ មានមន្ត្រីនគរបាលខ្លះស៊ីញ៉េវត្តមាន ហើយមិនចូលរួមប្រជុំទេ ស្មានតែលោកមិនដឹងឬថា អ្នកណាមានមុខប្រជុំ អ្នកណាមិនចូលរួមប្រជុំនោះ? ។ នេះបង្ហាញថា វិន័យរបស់មន្ត្រីនគរបាលយើងនៅមានភាពធូររលុងជាខ្លាំងដែលត្រូវតែធ្វើការកែប្រែឱ្យបានឆាប់រហ័ស ។ យើងជាកូនចៅរបស់ប្រជាជន ជាមន្ត្រីរបស់រដ្ឋាភិបាលស៊ីប្រាក់ខែ និងស្លៀកពាក់ខោអាវរដ្ឋាភិបាល ដូច្នេះត្រូវតែបំរើប្រជាជន បំរើរដ្ឋាភិបាលឱ្យបានល្អ ដើម្បីឆ្លើយតបទៅនឹងគុណបំណាច់ទាំងអស់នេះ ។
លោកស្នងការបានបន្តថា បញ្ហាទាំងនេះអាចមកពីប្រធានការិយាល័យនីមួយៗផងដែរ ។ ពេលខ្លះអាចប្រធានការិយាល័យមិនបានប្រគល់ការងារភារកិច្ចឱ្យគេធ្វើ ដោយសារការងារខ្លះមានលុយកាក់បន្តិចបន្តួចក៏សំងំធ្វើតែគ្នាឯងប៉ុន្មាននាក់ហ្នឹងទៅ មិនចែកគេធ្វើទេ លុះដល់គេមកធ្វើការមួយថ្ងៃគ្មានការងារអ្វីធ្វើ ពីរថ្ងៃគ្មានការងារធ្វើ យូរៗទៅក៏ណាយហើយក៏ធ្វើបែបហ្នឹងទៅ ។ ដូច្នេះទាំងប្រធានការិយាល័យទាំងស្នងការរងទទួលផែនត្រូវតែយកចិត្តទុកដាក់ និងចូលរួមកែប្រែលើបញ្ហាទាំងអស់នេះ និងត្រូវក្តាប់ឱ្យបានចំពោះអ្នកដែលមិនធ្វើការពិតប្រាកដ ហើយត្រូវហៅមកណែនាំ បើនៅតែមិនកែប្រែត្រូវរាយការណ៍មកថ្នាក់លើ ដើម្បីចាត់វិធានការដោះស្រាយឱ្យបានសមស្រប ៕
"
No comments:
Post a Comment